19.04.2023پښتون ېمه
[19.Apr.2023 - 14:52]پښتون يمه
خوښ د پښتونخوا په میږتون یمه
پښتون یمه پښتون یمه
خاورې به مې وايي چې پښتون يمه
پښتون یمه پښتون یمه
تۀ پۀ سور سالو کښې لکه ګل نغښتې راغلې يې
زۀ پۀ خپلو وينو کښې ګلګون يمه پښتون يمه
سود مې پۀ بل نۀ شي خپله يو بڅری خاوره هم
زه ګورئ ! پۀ دې حقله قارون يمه پښتون يمه
مړ به يم خو هر دَ زړۀ پرهر به مې خندا کوي
زۀ دَ وفا تخم يم ژوندون يمه پښتون يمه
زۀ ورکېدی نۀ شم دَ جانان دَ جبين نمر يمه
څيره د ادراک دَ سباوون يمه پښتون يمه
زۀ دَ بل نه طمع دَ سزا او قضا نۀ کوم
زۀ اثير دَ خپل ننګ دَ قانون يمه پښتون يمه
مونږ سندرې نۀ وايو محبوبې دَ پردو سترګو
زۀ دَ پښتنو سترګو مجنون يمه پښتون يمه
سپک نظر يې هم سترګې درنې کړي چې راوګوري
زۀ خدائ زېږولی هسې درون يمه پښتون يمه
تل پکښې دَ ژوند دَ ازادۍ سندرې اړوم
زۀ شپېلۍ دَ خپل فکر دَ شپون يمه پښتون يمه
زۀ تاريخ دَ خپل ادراک او خپلې فلسفې لرم
زۀ دَ خپلې خاورې افلاطون يمه پښتون يمه
چاته دې څوک نۀ وايي ما ټوله دنيا پېژني
زۀ خپله عنوان خپله مضمون يمه پښتون يمه
منمه چې وخت له خپلې پاڼې شوکولی يم
زۀ دَ خپل وجود دَ تار تړون يمه پښتون يمه
دا چې دې همه دنيا خوړلې وخت پۀ وخت يمه
ښکلې يمه، خوږ يمه ترسکون يمه پښتون يمه
وخته کۀ تا نن پۀ خپله خاوره ريژولې يم
زۀ به پرې سبا ﻻ رازرغون يمه پښتون يمه
داسې پامته دار هم دَ سپرلي دَ موسم نۀ يمه
ګل دَ خپل پرهر دَ ځيګرخون يمه پښتون يمه
ما به دَ حالاتو پېچ او خم نۀ کړي ادل بدل
زۀ خپله استازې دَ بدلون يمه پښتون يمه
بل خوا تللې نۀ يمه پۀ خپل وطن کښې ورک يمه
رابه شم دَ خپل ځان پۀ لټون يمه پښتون يمه
وخته ځه ته ښه لوبې په زړه د سایل وکه
خو زۀ پوه پۀ مطلب دَ زړۀ چاودون يمه پښتون يمه
رحمت شاه سایل
#PSDP