09.09.2022پښتون بدن
[09.Sep.2022 - 16:44]دغه نظم د فلسفي شاعر ښاغلي عطایي ملا دی چې تېرکال یې ماته په خپل خط رالیږلی و او ما وروسته په خپله دهغه له مخې ټایپ کړ .ده دا نظم له نن نه اته څلویښت کلونه پخوا یعنې په ۱۳۵۳لمریز کال کې په هلمند کې دپښتونستان دورځې په مناسبت لیکلی واو دهمدې کال دوږمې په مجله کې چې دکابل پو هنتون دژبو او ادبیاتو دپوهنځي مجله وه خپورشوې و.
پښتون بدن
---------------
داوچت ” شمشاد” په څوکو
دغیرت ” خیبر” سینه کې
د آسمان ” پامیر” په موټو
د ” کوږک” هره کوڅه کې
” دواورین ” هند کوه” په نوکو
د ” تکای” تږي کوګل کې
د ”کسي ” په تیږو پرښو
د” تیرا ” سورکي بورجل کې
د ” سپین غره ” په دنګه غاړه
د”تا جمیر” په هسکو تړو
د”بابا”په سپینه داړه
د”پو لاد ” په سختو دړو
د ” دلکش ” چترال ” په زړه کې
د ” کیمور” په هیرو شپو کې
دسرکش ” سالنګ” جوغه کې
د ”تورغره ” ورکو درو کې
ددې تړو په کږ لیچ کې
ددې لوړو په هرپیچ کې
ماښخ کړي داستانونه
ما جوړ کړي تاریخونه
نڅوي دا الهامونه :
(هرشکن مو بت شکن دی
دمغرورو دککرې
هره لویشته مو یاد ګار دی
دسرزورو دډغرې
دا دننګ آسماني تړې
دا دجنګ توپاني لړې
دا دپرښو کږلیچونه
ددښنه وودمرګ جړې )
دازما دبچو کوردی
دازما دبابا ګوردی
دامې وینه ، دامې مینه
دامې تن دامې وطن دی
دا دلوی پښتون بدن دی
د ” بخدي ”د آسمان څوکې
د ”پکتویس ” دغیرت لیکې
د ” زرتشت ”د زړه آهونه
د ”سوما ”د سینې څړیکې
د”سپین پوښو ”کاروانونه
د”سرخپوشو ”سېلاوونه
د ”سوري ”دجهاد نښې
د ”میرویس ”د ننګ زخمونه
د ”اکبر”دخنجر ژبه
د ”ایوب ”د تورې تندر
د ”ملا لې ” وروستۍ کړیکه
دمرګي وغیږته منډې
د”ایمل ”دژوند سندره
د ”دریا ”د مرګ یادونه
د ”اجمل”د غیرت چغې
د ” بابا ”دزړه تارونه
زما دشعر په څپو کې
زما دآه په نڅېدوکې
سوروي دننګ سازونه
سازوي دجنګ شعرونه
پاروي دا آهنګونه :
(له اکسوسه تر اندوسه
په یورګ کې یوه وینه
ددرانه پښتون جسد دی
په هر هډ کې مینه مینه
دا دسرووینوډولۍ ده
دخوني عقاب ځالۍ ده
هربوډایې شعر پسنده
هره پېغله جنګیالۍ ده )
دازما دبچو کور دی
دازما دبابا ګوردی
دامې وینه، دامې مینه
دامې تن دا مې وطن دی
دادلوی پښتون بدن دی
د بد مست ” هلمند” مو جونه
د”سیستان ” تیر پر تمونه
د ”اټک ”د آسمان لړې
د”احمد ” د آس ګردونه
د ” آمو ” څپاندې څنډې
دشپنیو سیلاوونه
د ” کوکچې ” سېلابي غاړې
داوښبه وو کاروانونه
د” ارغند ” شینکۍ لو خړه
د” سکندر ” ستړي آهونه
د ” هري ” توپاني مټې
د” تیمور ” مات اندامونه
د ” کابل ” آسماني څا څکي
د ” فرنګ ” د مرګ خوبونه
د” ګومل ” پولادي کا ڼي
د” اورنګ ” اوبه مغزونه
دزمان توپاني سیند کې
دپښتو په ابا سین کې
پاڅوي ځوان توپانونه
زیږوي نوي مو جونه
مستوي دا سیلابونه
هر تحریک مو مستي ساز دی
هریو نیزمو سد شکن دی
خونړي مو هریوڅاڅکی
دسرو وینو آبستن دی
پاڅئ پاڅئ ځئ یوکیږئ
درومئ درومئ روانیږئ
دلوی کور بنیادي څلو
ویرانیو کې دریږئ
دازما دبچو کوردی
دازما دبابا ګور دی
دامو وینه دامو مینه
دامو تن ، دامو وطن دی
دادلوی پښتون بدن دی