09.09.2022رحمان بابا ته
[09.Sep.2022 - 16:34]د حمزه شینواري کلیات
درېیم ټوک، مخ ۱۴۲
د رحمان بابا پر مړیستون باندې
لسم فروري ۱۹۶۳
.
که فطرت مې مینه ټکنده غرمه کړه
انتظار ورسره ګډه توره شپه کړه
.
اسوېلو راته ستا مخ هله موسکۍ کړ
چې زما د سوي زړه ډېوه مړه کړه
.
نن چې تود غوندې نظر مې درته وکړ
نو مې ستا د اننګو بله ډېوه کړه
.
بېرته لاړه چې یې غیر ورسره ولید
خدای مې هره یوه اوښکه پښتنه کړه
.
چې تا واړولې سترګې، ارمان راغی
ولې ما دې نوشۍ جذبه خفه کړه
.
هغه هم وو، یو مقام په محبت کښې
چې زما په خوله به نه وو، تا به ښه کړه
.
نن چې سم یې راته وکاته، محفل کښې
ما کږه په بېواکۍ خپله شمله کړه
.
ستا د زلفو صفت، ستا تر وېښتو ډېر و
ځکه شپه مې د خپل ژوند دومره اوږده کړه
.
سږنی سپرلی راغلی په دا شان دی
چې کوله یې د هر ګل راته کاسه کړه
.
عجیبه ده چې رحمان په کښې مېشته دی
خلک هغه هم موسومه هدیره کړه
.
حمزه! نن د واعظ خوله کښې څه اثر وو
ورته ما چې په تتۍ ژبه توبه کړه
.
.
فطرت = ۱) طبيعت، خټه ۲) پنځ، پيدايښت ۳) ابداع، اختراع
ټکنده غرمه = ټاکنده غرمه، ټکڼه غرمه، سره غرمه
اننګی = بارخو، باړخو، روخسار
بېواکي = بېتابي، خوارځواکي، لاچاري، لاڅاري
سږنی = اوسنی، سږن، د سږ، د جاري کال، د روان کال لکه سږنی کال، سږنی سپرلی
کوله = کَؤ-لَه = ۱) نلۍ ۲) کلاه، د سر پټکی، پټکی ۳) بې چته کوټه
موسوم = نوموړی، نومولی، نوملی، یادولی
(غوړ چان: ډاکتر ممتاز خان)