18.06.2022شعر او څلورېځې
[18.Jun.2022 - 13:24]شاعر: سید عبید الله نادر
د علم سره مینه
زه د عــلم پــــــه ډیوه یــــــــم، پروانه
سر می کړی ، په دي لار کـې نذرانه
له ازله می، قســـــمت، په معرفت وو
ځکـــــه یمـه په دنــــیا کې ، فرزانه
د وحدت شراب د عــلم ســاقی راکړه
په یو ګوټ یي یم ، تراوســـه مستانه
نشتـه لوی ګــوهر تر علم و معرفت نه
ځکـــه بولي ، هوښیـــاران یي خزانه
څـوک چی نه لري ، د علـم سره مینه
تر هـــغي به چــــیري نه وي ، دیوانه
-----------
څلورېځې / شاعر: سید عبید الله نادر
خیالي اتلان
څوک په لافو ځان ښودنه ، کړی سیالي
له ځان نه جوړ کړي، یو اتل د خـــیالي
د چا پرواز د مشرب دومره وي عالي
چې خپـــله ډکه پیمــانه ویني ، خــــالي
*****
د غلیم په ملک کې
د غلیم په ملک کې پروت یي ، د وطن نارې وهی
ته به څـــــــو لـــکه بلبله ، د چمــــن نارې ، وهی
په آخـــــر به خــوار ذلیله ، ګرفتــــارشی ، د غلیم
ته چــي دي وطن کـــې هر دم ، دختن نـاری وهی
*****
زیار او زحمت
سمسور به دا وطن شي ، په زیار او په زحمت
آباد به دا وطـــــن شي ، په کــــــار او په همت
په مټو د ځـــــــوانانو ، په تدبیر د عــالمـــــانو
جوړیږي ، له ډاګــــونو ، ویرانو څــخه جنت
*****
مالیاران
په دي وطن کې غمــخواران نشته دی
د باغ و بڼ یي ، ما لیاران ، نشته دی
وران شـــو وطن ، د جــهالت په لمبو
د جوړیدو یي ، معمـــــاران نشته دی
*****
په مانا کې ډوب
کـله کــله شمیر د مړو کــــې زه حســـاب یم
هر یو سوال ته، په خـــلقت کـــې لا ځواب یم
یو ګړې چې بیخودۍ کــې ، ځــــان ځیر شــم
هغــه وخت دی چي،معنی کې لوی دریاب یم
*****
زما قرار
نه پوهیږم چـي به چیرته ، زمــا قرار وي
چی ګوګــل که می سر لوړی دا شرار وي
خو پس له مرګه که می غواړئ په دنیا کې
عـارفــانو په ســــیني کــې زمــا مـزار وي
*****
زمونږ پته
نړۍ په مخ تیــاره شـــــوه، له خـــپله جهالته
تر قیـامته به ویښ نه شو ، لــه خـوبه د غفلته
کاروان له مخي تللی، مونږلاس تر زنۍ ناست یو
له پاڼـي د تاریخ څــخه ورکیږي، زمونږ پتــه
*****
د ګدازاثر
دا می خیال وو ، چي محرم شمه د راز
شپــه او ورځ وم، په دعــــــا او په نیــاز
په طـــاعت او عبادت هم حاصـل نه شو
هغه څه چي می حاصل شول ، په ګداز
*****
د خلاصون لاره
زړه ضمیر می معرفت کې کړې ، روښانه
چي مشکل می شي ، په علم باندی ، آسانه
روح او تن می ، جهالت کې په عذاب شو
د خــلاصـــــون لاره ده ، تا سره رحمانه
*****
د سترګو آئینې
په آسمان کې می د خیال، لکه ستورۍ ځلیدلی
آیيني کې می د سترګو، کــله کــله ښکاریدلی
شکایت ستا له بیلتونه په زړه کې دومره ، نشته
ځکه کعبی کې می د زړه ، په عمرونو تاویدلي
*****
د روزګا جفا
که حیات او ژوند همیش وای تل تر تله
دا جفا به د روزګـــار وای په هر کــــــله
ښه خـو داده ، چـي هره شیبه ، تیریږي
کـه نه تل به ، دا جفـــا مونږه زغمــــله
*****
د زړه دنیا
راځـئ چي کړو ، دا دزړه دنیا ودانه
دا تیارۍ په معــــرفت باندی روښانه
په نفاق او په کینو کې به تر څو وي
آرزوګـــــانو آرمــــــانونومېنه ،ورانه
*****
دعبرت لید
مړی ښخول پر سر باندی یي ، خاورې اړول
تورو تیارو کې د لـــحد یي یواځـــي پریښودل
دا و هغـــــــه نادانو، جـــاهلانو ته عبرت دی
چي يي نشته، په زرګــــــونو اشاراتو ویښیدل
*****
ماهرو ساقی
داسي شراب چي په دردونو مي آشنا کړي
چي ضـــمیر مـــــي د ریا څخه صفا کړي
تمنـــا می، د مـــاهرو ســـاقی د لاس ده
په یو ګوټ له دواړو کونو مي ، فنا کړي
*****
د وطن وږمې
نه پوهیږمه،وږمی د کـــــوم چمن راځي
خوشبویي ورسره نغښتی، د وطن راځي
معـــطره ده صــــحرا، په عطرو باندی
که د مشــــکو رایحه نن ، له ختن راځي
*****
د بشر په حال غمجن
نیمو شپو کې چي بشر په حال غمجن ، وي
بـی قراره،په بستر کـــې ،اند یښـــــمند وي
د بشـــر په درد و غـــم کې ، تل کــــړیږي
هغه څـــوک چـــي په عالم کې، دردمن وي
*****
په نفسونو حاکمیت
لاره د حل ، په نفسونو حــا کمــــــــــــیت دی
راوتل لـــه حـــرص و تمـــی ، په همــت دی
حرص وتمی غلامۍ کې،که څوک ژوند کړي
ژوندون نــه دی ، و مردانــــو ته ذلت دی