01.06.2022جنکۍ نه راځي
[01.Jun.2022 - 08:17]خلک بدل شوو که بدل شولو وختونه؟
جینکۍ نه راځي ګودر ته
.
په خوا به هر مازیګر د نظر سېل و
منګي په سر به جونو جوړ کړی ټېل و
د ګودر هر بوټی به عطر پولېل و
اوس په کښې الوځي سپېره سپېره بادونه
.
دا څه جادو کړ چا په کلي کور؟
د ګودر پاتې نه شو څه حاجت نور
په دیدنونو باندې پورې شو اور
خدای زده مینو ته چا وکړه ازارونه
.
تل په مینو کېږي داسې ناسازې
دلته به رانه شي بیا زلفې درازې
اسراره ګرځې به اوس دلته یواځې
چې زړه دې تنګ شي یادوه زاړهٔ وختونه
.
.
ټېل = ګڼه ګوڼه
پولېل = خوشبويه تېل، روغن موی، سرغوړ، پولېل
زلفې درازې = اوږدې څڼې، اوږد وېښتان
یواځې = تنها
یوازې = صرف
تل = همېش
شاعر : ډاکتر اسرار (غوړچان: ممتاز خان)