12.04.2022غزل
[12.Apr.2022 - 15:46]ارواښاد ساحر اپريدى
پایزیب - مخ ۱۰۴
.
هغې د سکڼي حسن مېرمنې ته خو ګوره
څومره په ناز زړه وړي، کبرژنې ته خو ګوره
.
زهر د فریب دې د جفا په جام کې راکړل
ما ته دوست نهٔ، زما وژنې ته خو ګوره
.
کوم هغه زړګی دی چې سوړی سوړی به نه شي
ستا د مست نظر د ناز ویشتنې ته خو ګوره
.
ډک یې کړ وربل ورله په سرو ژېړو ګلونو
اوس مې د اغزو ډکې لمنې ته خو ګوره
.
ستا د عاشقۍ تهمت بې حده مشهور کړم
ما ته نهٔ، دې خپلې پېرزوینې ته خو ګوره
.
چېرته چېرته ما لیکلی نهٔ دا ستا نامه ده
زړه ته مې، هر کاڼي، بوټي، ونې ته خو ګوره
.
پټ د نقاب لاندې راته ښه ګوري ساحره
ګوره کنه، هغې سترمنې ته خو ګوره
(غوړچاڼ: ممتازخان)