05.01.2022سباوون
[05.Jan.2022 - 11:26]ارواښاد قلندر مومند
سباؤون - مخ ۸۲
.
کله کله چې نصيب مې ملاقات شي
کاینات مې په نظر کښې خرابات شي
.
ګلستان مې که په وينو تازه کېږي
هر اغزی دې هم زما په زړه کښې مات شي
.
د جهان ښکلي مې هسې په زړه پنډ دي
چې ګومان مې په زړګي د سومنات شي
.
زه د دار په سر، هغه در کښې ولاړ دی
خدای زده بیا د زاهد ولې مباهات شي
.
د بڼو غشي دې تږي دي د وینو
خدای دې نه کا چې مې زړه کښې وینه قات شي
.
د کامل هم نشیني برکتي کړم
تجربې مې په غزل کښې روایات شي
.
د جهان ښکلي به څه کړي نه پوهېږم
قلندر مومند که بې وخته وفات شي
.
.
خرابات = ۱) شراب خانه ۲) فضول خرچي، بدعملي، فحاشي
مباهات = ۱) ویاړ، فخر، لويي، شان او شوکت ۲) ساتندوی، دفاع کؤونکی ۳) بریا، بریالیتوب
قات (قحط) = ۱) وچکالی، سوکړه، د کښت (فصل) ښه نه کېدنه ۲) د خوړو کمښت
راویات = دود، دستور، رواج
(غوړچان: ممتاز خان)