ټوک ټوک
[11.May.2018 - 08:34]د رحمان بابا کلام
.
ماتوي مې خوله په سُوک
خراشي مې زړه په نُوک
.
که نارې وهم، که ژاړم
پروا نه لري يو چُوک
.
راشئ ګورئ منصفانو
د دلبرو دا سلوک
.
لکه ګل په لاس د طفل
زما زړه کا شُوک په شُوک
.
د چشمانو په غمزه یې
ژوبل ژوبل یم، ټوک ټوک
.
په توسن د فلک سَور شي
دستار کېږدي په سر هُوک
.
هېڅ اثـر ورباندې نه کا
د دردمندو درد او دُوک
.
اې رحمــانه چې عاشق شي
ځان دې ژاړي کُوک په کُوک
.
.
چُوک = لږ شان، کم، ذره
منصفان = منصفان د منصف ډېرګړی (جمع) دی، منصف = انصاف کونکی، عادل، انصاف ګرندی، د انصاف خاوند
سلوک = رویه، کردار، طور طريقه، خوی، خصلت
طفل = کوچنی، ووړکی، ماشوم
شُوک = ۱) شوکېدلی، شکېدلی، پرې شوی، غوڅ شوی ۲) څيرې شوی، بژه شوی ۳) لوڅ شوی، مال او شته ترې په لاره کې اخيستل شوی
چشمان = سترګې
غمزه = ناز، ادا، نخر، مکېز، د سترګو پۀ ګټ اشاره
ټوک ټوک = ټوټې ټوټې، پارچې پارچې
توسن = سرکش اس، مست اس (آس)
فلک = اسمان، هسک
دستار = پټکۍ، لونګۍ
هُوک = په خيال کې، ورک، لاهو، په چرتو کې ډوب
دُوک = غم، نول، د خپګان رنځ
کُوک = کوکه، کريزه، کوکاره، چیغه
.
.