افغان سوله
[17.Mar.2021 - 15:44]په افغانستان کې د سولې لپاره د مارچ په اتلسمه د مسکو د مشورتي غونډې د جوړېدو په درشل کې څو ضروري يادونې!
سره له دې چې د فساد او بې کفايتۍ له وجې د افغانستان په اوسني حاکم مشرتابه کې په سل ګونو ګڼ شمېر نيمګړتياوې او کمزورتياوې وينم او په کلکه يې غندم، خو د خلکو له رايو پرته د بهرنيو او کورنيو فشارونو له لارې په زور استعفا ته د اشرف غني مجبورول او ددغه مجبوريت تعميل د ټول افغان ولس لپاره دريمه تاريخي ماتې بولم:
لومړی: په ۱۹۲۹ کال کې د انګريزانو او د هغوي د کورنيو مزدورانو(ګوډ مُلا، حضرتانو او سقاويانو) له خوا استعفا ته د د غازي امان الله خان مجبورول او د افغان ولس تاريخي شاتګ.
دوهم: په ۱۹۹۲ کال کې د يوې نړيوالې توطيې په پايله کې د پاکستان او د هغه د افغان ملاتړو له خوا استعفا ته د ډاکتر نجيب الله مجبورول او د افغانستان د نظام، اردو او ټولې مادي او معنوي هستۍ لوټول او له منځه وړل.
دريم: د (امريکا - پاکستان- ايران) مثلث او يا کيدي شي په څو ضلعي سازش کې د طالبانو او افغان - زور واکو سياسيونو په فشار استعفا ته د ډاکتر اشرف غني مجبورول او ددغه مجبوريت عملي کول.
په روسيه کې د زرګونو مېشتو افغانانو د مطلق اکثريت په همفکرۍ کولای شم ووايم چې:
موږ سولې ته د رسيدو لپاره ژر تر ژره د اور بند ټينګېدل او په ملي، سيمه اييزه او نړيواله همغږۍ کې د ملګرو ملتو تر نظارت لاندې د خبرو ميز ته د افغانستان د دولت او طالبانو د استازو ستنېدل او د دواړو خواوو د مخامخ خبرو پيل غواړو.
موږ د پرديو د ويجاړوونکي پلان او فرمايش په وړاندې د افغانستان د ملي حاکميت په څنګ کې کلک ولاړ يو.
موږ د افغانستان د ملي اردو او ملي امنيتي ارګانونو، ساتل، عصري تجهيز اوباعزته پالنه غواړو.
موږ د افغانستان د راتلونکي نظام او زعامت ټاکل د افغانستان د خلکوحق بولواو په دې برخه کې هره بهرنۍ پرېکړه مردوده ګڼو.
په زور د طالبانو تسليمي او يا استعفا ته د دولت د اوسني مشرتابه مجبورول له ټول افغان ولس سره ظلم ګڼو او په کلکه يې مخالفت کوو.
موږ سياسي او ټولنيزه ازادي د خلکو حق بولو،د طالبانو په شمول ټول افغان ولس د سياسي ازادۍ او د خپل سياسي نظر د تبليغ او تعميم حق لري. هر څوک حق لري چې په خپل منطق د خپل نظر د څرګندولو له لارې د خلکو زړونو ته لار پيدا کړي او د خلکو د رايو له لارې سياسي قدرت ته درسيدو هڅه وکړي.
سياسي قدرت ته د رسېدو او د قدرت د ساتلو لپاره د خلکو د وينو تويول مطلق ناروا بولو او د مخيوي لپاره يې په ټولو افغانانو د يووالي غږ کوو.
د سولې لپاره د افغانانو او نړيوالو ادرسونو ته ددغه اوازد رسېدو په هيله!
شېرحسن حسن
مسکو-روسيه
17.03.2021