13.03.2021د رنګونو
[13.Mar.2021 - 15:13]
شیرین یار یوسفزی/ د رنګونو پیوندونه، مخ ۱۰۰
.
لویه ورشَو د پښتنو که بې بهاره نه وای
ښکلې هوسۍ به د دامانې دومره خواره نه وای
.
منګي ټیکړي، ګړونج ټوټې، جونه تار تاره نه وای
زموږ د کلي د سیند غاړه به وزګاره نه وای
.
لکه ماشوم به کټورو پسې لاس نه جګوم
خو سېل د زاڼو دې آسمان کښې بې قطاره نه وای
.
زما د زړه کاله ته ګوټ داسې ممکن خو نه ؤ
که ستا نظر سره زما د سترګو لاره نه وای
.
چا به زما نه د لاله ګلونه څنګه رېبل؟
داسې که زه په خپله خاوره بې اختیاره نه وای
.
تا به زما د کامرانیو جنډې هسکې لیدې
زما د ژوند که د بلا په کوڅه لاره نه وای
.
.
ورشَو = څر ځای، وښیاڼه، مرغه، برغه، سبزه زار، مرغزار
وای = په ارماني تېرمهال (ماضي) کښې د کړ (فعل) پای ته "ا" او "ی" ورزیاتېږي. "کاشکې”، "کاش" او "که" نومونه ارماني تېرمهال ته نغوته (اشاره) کوي
دامان = ۱) ډاګ، د غره لمن، مېره ۲) دښت، صحرا، بيابان ۳) غولی، دالان
ګړونج = د لرګيو جوړ کړی شوی د منګيو (ګړو) د اېښودو ځای، ګړماچی، ګړماچۍ، ګړمچی، ګړونچی
کامرانۍ = بریالیتوب، کامیابۍ
........................................................
د ناز کات/ ارواښاد داکتر کبیر ستوری/ سندریز پیغام، مخ ۲۷
.
ګل بڼ وای د بلبلو، بس یوازې زه او ته وای
دا ستا د تورو زلفو د وربل لاندې مې شپه وای
نو دا به ډېره ښه وای
نو دا به ډېره ښه وای
.
ډېوه د ښکلي مخ دې بلېدلې په تورتم کښې
د ګلو په وږمو کښې زما تا سره جرګه وای
نو دا به ډېره ښه وای
نو دا به ډېره ښه وای
.
کیسې د محبت وای، بل مضمون په منځ کښې نه وای
د سترګو په ککو کښې په ځیر ځیر د ناز کاته وای
نو دا به ډېره ښه وای
نو دا به ډېره ښه وای
.
بالښت مې ستا څنګل وای او ما سر وای پکښې اېښی
دنیا نه ناخبره او د مینې ولوله وای
نو دا به ډېره ښه وای
نو دا به ډېره ښه وای
.
بلبلې ګډېدلې، کارغان تللي وای، له بڼه
د ستورو اتڼونه وای، هم مینه پښتنه وای
نو دا به ډېره ښه وای
نو دا به ډېره ښه وای
.
.
یوازې = صرف
یواځې = تنها
تورتم = ۱) توره تياره، ډېره تياره، تپه تياره ۲) اړی ګړی، ګړبړ، ګډوډي
ککی = کسی، د سترګو تور، باتوره، باتور، د سترګو ککی
ځیر = پام، توجه
ولوله = جوش، جذبه
بڼ = باغ
.....................................
زما سلام/ ارواښاد ملنګ جان بابا/ خوږې نغمې، مخ ۲۵
.
زما سلام دی په هغو چې سخت په ځان تېروي
د قام لپاره تکلیفونه د زندان تېروي
.
زما سلام دی په هغه خدمتګاران د وطن
چې محبت سره جیلو کښې دي بندیان د وطن
.
دوی خپل سرونه دې په ویاړ کړي ټول قربان د وطن
د آزادۍ په مینه چې جیلخانې ته ځینه، د وطن پت ساتینه
.
دغه کسان د خدای په فضل به ایمان تېروي
چې قام لپاره تکلیفونه د زندان تېروي
.
چې د وطن د پاره ډېر غټ تکلیفونه باسي
د آزادۍ په لاره جیل کښې زحمتونه باسي
.
د قام عزت غواړي په خپل ځان تاوانونه باسي
دا لیډران فداکاران د پښتون، خدمت ګاران د پښتون
.
وروستني نسل به د دوی څنګه احسان هېروي؟
چې قام لپاره تکلیفونه د زندان تېروي
.
څوک چې خپل ځان بولي پښتون، له مرګه نه ډارېږي
لکه د ډمې د پردو پیسو ته نه درېږي
.
که سر یې لاړ شي آزادۍ ځنې هېڅ نه تېرېږي
که غیرتمن پښتون وي، په زړه دردمن پښتون وي، په قام مین پښتون وي
.
هغه نو کله د بل لاس لاندې ګزران تېروي
چې قام لپاره تکلیفونه د زندان تېروي
.
د خدای د پاره وروڼو ټول شئ، ځانځاني مه کوئ
زړونه مو یو کړئ، سره یو شئ، ناداني مه کوئ
.
وکړئ پوښتنه د بندیانو، ناځواني مه کوئ
خپل لیاقت وګټئ، خپل شرافت وګټئ، د قام عزت وګټئ
.
تر څو به اوښکې له ډېر درده ملنګ جان تویوي
د قام د پاره تکلیفونه په خپل ځان تېروي