22.02.2021غزل
[22.Feb.2021 - 15:24]ارمغان خوشال خټک
مخ - ۵۰۱
.
زما عشق په هغه شان دی، لکه و
ستا خاطر هغه سندان دی، لکه و
.
که ته هر څو بدقولي او بدعهدي کړې
قول، عهد مې همان دی، لکه و
.
خرخښې دې لکه وې، په هغه شان دي
فتنه ګر دې سُور پېزوان دی، لکه و
.
د رقیب خبره مه نغوږه اې یاره
چې رقیب هغه شیطان دی، لکه و
.
د بڼو په ناوکیو دې غلبېل کړ
نښانه مې درته ځان دی، لکه و
.
په خاطر باندې مې داغ دی، ستا د لاسه
ولې هسې بې درمان دی، لکه و
.
بل ګمان فکر، خاطر لره در مهٔ وړه
خوشال ستا بندګان دی، لکه و
.
چې دې زړه هسې پرې ناز کوه دلبره
په خوشال دې خاطر ګران دی، لکه و
.
.
خاطر = ۱) زړه ۲) فکر
سندان = سټ، هغه اوسپنيزه آله چې پښ ورباندې وسپنه ږدي او پر پلک يې وهي
قول = ژمنه، ژبه (کول)، پازه، وعده، عهد
همان = هغه، هم هغه، هم دغه
خرخښه = ۱) جګړه، جنګ، جنجال، ژړل، ناهيلي کول ۲) وسواس، وسوسه، تشويش، د زړه پرېشاني
فتنه ګر = اور لګاو، اور ګډی، شرګډی = شریر، شرارت انګیز، شرارت پیشه
نغوږل = اورېدل، غوږ نیول
ناوک = غشی، تير، خدنګ، ناوکی
نښانه = نشانه، هدف، موخه، اثار
درمان = درملنه، دارو درمل، دوايي، علاج
بندګان = د بنده ډېرګړی (جمع)، غلام، خدمتګار
(ممتازخان)