10.02.2021غزل
[10.Feb.2021 - 12:47]په ما صرفه دې د هر ظلم هغه ګران نه کوي
خو چې سبا په ټیټو سترګو بیا ارمان نه کوي
نن مې رقیب د یار د مخ په سپین جومات کې لیده
هسې چا ویلي، چې مونځونه کافران نه کوي
زما یاران بلا تورونه په یارۍ لګوي
خو په یارۍ باندې پیسه قدرې تاوان نه کوي
د خپل ښایست دوران یې ټول زما په زړه کې تېر کړه
دا وایي څوک چې ښکلي یو ځای کې ګذران نه کوي
زه په ترخې خبرې مرم عمردراز مروته
زما د قتل ډېر سوچونه دې یاران نه کوي
ارواښاد عمردراز مروت