04.02.2021کاروان او
[04.Feb.2021 - 16:09]ځمکه وه شهیده شین آسمان په جنازه کې و
سر په سر دا څه موده جانان په جنازه کې و
سوله په تابوت کې پسې اوښکې صف ولاړې وې
جنګ یې بې اودسه را روان په جنازه کې و
یو موټي لونګ آشنا عابد باندې مې غږ وکړ
غلی و، د هیلې د ارمان په جنازه کې و
شنه زرغونه رنګ په سور کفنو شهیدانو وه
لمر سلګو نیولی د باران په جنازه کې و
سره ګلونه زړونه یې ړندې ږلۍ وهلي وو
تش خالي لاسونه یې باغوان په جنازه کې و
غم د کومې بُورې مور د ورارې خور به و ګالو
دوه درې نه دي درست افغانستان په جنازه کې و
ستا آواز یې واورېده خو ژبه یې کولپ زړه یې کولپ
ډېر و بښه یاره چې کاروان په جنازه کې و
۲۰ قوس ۱۳۹۹ هجري شمسی، خوست توره وړۍ
کاروان
Pmkarwan Karwan
دعوه
ښاغلی عبدالباري جهاني
ورکه مېنه - مخ ۲۰۲
.
کندهار مې د بابا په قباله دی
که پنجشير دی، که واخان دی، وطن زما دی
.
هره لوېشت مې د نيکه او بابا ګور دی
په هر ګام باندې لحد او کفن زما دی
.
هر غاټول يې زما له وينو رنګ اخيستی
دا په وينو روزل شوی چمن زما دی
.
له نيکه راپاتې شوی په ميراث دی
دا د مشکو رباتونه ختن زما دی
.
سرداري يې زما په پچه ده ختلې
له آمو تر مست هلمنده، ماء من زما دی
.
که تاجک دی، که اوزبک دی، يو افغان دی
د دې خاورې هزاره، تورکمن زما دی
.
چې فکرونه د نفاق پالي په سر کې
امتياز يې د وهلو کشتن زما دی
.
ښه يې زما دی، بد يې زما دی، هر څه زما دی
د دې خاورې ارغوان او زغن زما دی
.
دلته هره تېږه، کاڼی، بدخشان دی
دا لالونه، غرونه غرونه دمن، زما دی
.
د ازل تقسيم باغوان يم پيدا کړی
دا بهار، دا لاله زار او ګلشن زما دی
.
دا مورچل مورچل پکتيا او دا شیربرېتي
چې فلک به کوږ ورګوري دښمن زما دی
.
که ميرويس دی، که اکبر، که مسجدي دی
هره تُوره، هر ميدان او تورزن زما دی
.
فتح زما ده، فخر زما دی، جشن زما دی
شهيد زما دی، د ويرژلو شيون زما دی
.
چې په زړه کې څه در تېر نه شي آسمانه!
چې پرون مې د نيکونو و، نن زما دی
.
.
دعوه = ۱) د حاکم په وړاندې له يوه سړي څخه د بل سړي حق غوښتل، غوښتنلیک وړاندې كول، هيله كول، اسره كول ۲) دعوا، دنګله، لانجه، شخړه، جګړه، ادعا
قباله = پلورلیک، قواله، د ملکیت سند، د پلورو (خرڅولو) سند
لوېشت = لېشت، د غټې ګوتې او خچې ګوتې تر سره واټن (فاصله)
غاټول = لاله، مرغټ، شندی، شیندی ګل، غانټول، خاټول، سندوی
ختن = د ولسي چين د جمهوريت د سنکيانګ په ايالت کې د يو ښار او د يوې سيمې نوم دی، دا سيمه په تاريخ کې ډېره مشهوره او مُشکو يې بين المللي تجارت درلود
پچه ختل = ۱) عسكرى خدمت ته غوښته، عسکرۍ ته جلبېدل ۲) د خسڼي (قرعه، پچه) ايستلو په ذريعه د چا ونډه ټاکل کېدل
امتیاز = ۱) توپير، بېلولی، بېلتون، فرق، تميز، جدایي ۲) ښه والی، لوړوالی ۳) هغه حق يا اجازه چې د دولت له خوا د ورځپاڼو، مجلو او ته ورکول کېږي
ماء = اوبه
نفاق = مړغنډۍ، بې اتفاقي
کشتن = وژل، مړ کول، قتل کول
ارغوان = ارغمان، يوه غرنۍ ونه ده چې ګردې پاڼې لري او ګڼ سور ګلان کوي
زغن = ټپوس، موږک باز
تېږه = کاڼی، بغرګه
فلک = اسمان، هسک
دښن = دره، تنګی، ترۍ، ناوه، تنګه، راغه
ازل = تندی، قسمت، تقدیر
تقسیم = وېش
فتح = بریا
فخر = ویاړ
ويرژلی = غمځپلی
شیون = شېون، سانده، فریاد، ګریه او غم
.
.