اتفاق
[03.May.2018 - 13:37]ارواښاد صاحب شاه صابر
.
بې کوره شي چې څوک په بې درکو پسې ګرځي
درانه خلک سپکېږي چې په سپکو پسې ګرځي
.
زما د قام د کومې بدبختۍ به درته وایم
چې څوک را زلمي کېږي په ټوپکو پسې ګرځي
.
د زرکو د کوترو ښکار د نورو مشغله شوه
زما د غرونو باز په توت خورکو پسې ګرځي
.
بیا څوک د پښتنو د اتفاق سندرې وایي
دیوان یې د خوشال په لاس خټکو پسې ګرځي
.
سلا کوي ، جرګه کوي ، غونډېږي تندرونه
څوک ځاله جوړوي ځان له په ډکو پسې ګرځي
.
د هغې غرڅنۍ غړۍ مې هغسې په زړه ده
لا هغسې مې فکر په کنجکو پسې ګرځي
.
د ښکلو په سینو کې بې غرضه زړونه ګوري
صابر بلا وهلی دی په ورکو پسې ګرځي
03.05.2018