سیلا ني
[25.Oct.2017 - 14:46]سیلا ني
چې ښایست ترينه شرمیږي اروپا ده
چې وختونه پري نازیږي اروپا ده
زه د ژوند په دغه واړه رنګینو کې
د نازونو د رنګونو په سپرلو کې
سیلانې یم په مزه مزه روان یم
.........................................
کله ودریږم په غور باندي ګورم
د " پاریس " د حسن لوړو منارو ته
کله کله وارخطا ګوته په خوله شم
د "بیلجیم " " فرانس "حسینو نظاروته
دغه لوړو محلونو ته حیران شم
خیال مي یوسي د خیالونو پلوشو ته
چې "هالینډ "کې د یارانو سره ګرځم
د نظر په نظر ګورم ښاپيرو ته
د "ډنمارک "او د " اټلي " واړه رنګونه
ځایومه د زړګي په درزیدو کې
دلته ناز دلته مستي دلته ادا ده
دلته شپه هم ویښه ویښه ده رڼا ده
چې وختونه پري نازیږي اروپا ده
زه د ژوند په دغه واړه رنګینو کې
دنازونو د رنګونو په سپرلو کې
سیلانې یم په مزه مزه روان یم
.............................................
هر یو ښار د "جرمني "بدل بدل دې
زما خیال په کې چورلک وهي ورکیږي
چا لاسونه برغ ورکړي دي روان دي
څوک د یو بل نه ځاریږي قربانیږي
څوک خیر مار دي خو خیرات په هنر غواړي
د جذبو په ژبه څومره ښه پوهیږي
دوکانونه د ښایست دي غوړیدلي
چې یقین ورته حیران دې حیرانیږي
"سویس "لري هم ، هسي رنګه ښکلا ګاني
چې دنیا یې په کتلو نه مړیږي
د هر چا دلته کې بیله شان دنیا ده
د حیا نه ورکه شوي چې حیا ده
چې وختونه پري نازیږي اروپا ده
زه د ژوند په دغه واړه رنګینو کې
د نازونو د رنګونو په سپرلو کې
سیلانې یم په مزه مزه روان یم
.........................................
له دي واړه ښایستونو مي زړه تور شي
چې را یاد راته لوګي د "پيښور " شي
اروپا راته پردۍ پردۍ ښکاره شي
چې را یاده مي حیا د "هشنغر " شي
پښتون خیال مي دغیرت سندري وایئ
را په زړه چې مي " تیرا" کله" خیبر " شي
د "سوات ، "دیر " او "صوابۍ "رنګونه ستایم
چې ضمیر مي د زړګي سره په شر شي
چې لا یقه هم غیرت دې هم وفا ده
د یورپ نه ډېره ښکلي " پښتونخوا" ده
امن غواړمه په دغه رنګینو کې
د ګلونو او رنګونو په ورشو کې
زه پښتون یمه د میني قدردان یم
سیلانې یم په مزه مزه روان یم
...........................................
لا یق زاده لا یق