باغ
[17.Jun.2017 - 12:43]
غنیمت = ارزښت وړ، نېکمرغي = Blessing, boon, plunder
لخلخه = د څو خوشبودارو څيزونو مجموعه چې مريض ته د دماغو د تقويت په غرض وربويولی شي = Aromatic ointment
مشام = ماغزه، د بویولو وړتیا = The brain, the sense of smelling
پیر = بوډا = An old person
برنا = زلمی = A young person
لؤلؤ = يو ډول ښځينه د مټ ګاڼه ، بازوبند = A type of women’s jewellery
لالا = رېدی، لاله، يو سور رنګ لرونکی ګل چې په منځ کې پرې يو تور داغ وي، خانټول، غاټول = A poppy flower
ارغوان = د ډول ګل نوم دی = The Judas tree flower, Cercis siliquastrum
بنفشه = چوڼیاکۍ = A type of flower, Viola odorata
شقایق = د رېدی ګل = A poppy flower
نوا = غږ، کوک، راګ، نغمه = A sound, a song
غلطان = رپاند، لړزان = Thrilling, waving
ګریاني = ژړېدنه، په ژړا کېدنه = Crying
ګلګشت = په ګلونو کې ګرځېدنه = Walking amongst flowers
صهبا = شراب، می = Red wine, alcohol
تعطیل = خوشیا، وزګاري، رخصتي = Vacation, free time, holiday
کامرانۍ = بریالیتوب = Success
اندوه = غم، تشویس = Anguish, sorrow
سفل = ژوره، ځوړه، ځوړی، نشیب = Lowliness
خصلت = روږتیا، خوی، عادت = Habit
وضعه = حالت، اکر = State
ما فیها = لکه چې څه هم دي، هر څه = What is, eveything
ـ
ـ
د بهار ننداره او د خپلې خوددارۍ اظهار
د خوشال بابا رح دیوان
مخ - ۷۵
د نوروز منت په باغ دی، په صحرا هم
نوراني يې شي له فيضه هغه، دا هم
چې په باغ کې رنګارنګ ګلونه وا شي
غنيمت ده، د ګلونو تماشا هم
لخلخې د نوبهار په هر مشام ځي
ګلدستي یې څنډوي پير و برنا هم
د ګلونو هار په غاړه د دلبرو
شرموي لعل و ياقوت، لؤلؤ، ﻻﻻ هم
د معشوقو په زلفينو کې ځای وکا
ښايسته ګلونه پاس په وربل لا هم
ارغوان، که بنفشه، که شقايق دي
زيبايي لري يو ځای، جدا جدا هم
په هر ګل باندې ټټر مږي بلبلې
بيا له شوقه په هوا کاندي نوا هم
د هر ګل په مخ چې سر کېږدي بلبله
پرې غلطان غلطان راځي باد سبا هم
په ګلزار پسې بلبله دل کباب ده
په ارمان یې ځيګرخون دی د مينا هم
څوک په عيش، په عشرت کې، څوک په غم کې
ځينې څه چارې ليدهٔ شي په دنيا هم
د قفس بلبله ژاړي ګرياني کا
چې به چېرې په ګلګشت والوځو بيا هم
په هغو زما سلام، ما دې هم ياد کا
په ګلزار کې چې نګار لري صهبا هم
څو بهاره مې بې ميو معشوقه ځي
دا خود رای فلک څه چارې کا پر ما هم
ما وې ژر به څرخ زما په کام راوخوري
ولې ډېر تعطيل یې وکړ، ﻻ یې کا هم
ـ
چې وخپلې کامرانۍ ته مې شا کړه
غم اندوه د فلک نه لرم، پروا هم
ـ
له سفله منت به هېڅ دانا وانه خلي
چې خبرې په خصلت شي په عطا هم
ـ
د منت دارو که مرم، په کار مې نه دي
که علاج لره مې راشي مسيحا هم
ـ
د فرښتو آمين منت دی، په دعا کې
ﻻ جرم ورځنې پټه کړم دعا هم
ـ
د جهان غمونه واړه پکې ځای شول
شکر دا چې زړۀ یې لوی راکړ وما هم
ـ
چې ليدلې دې وفا د هغه يار وي
په دوه سترګو قبلوه د دهٔ جفا هم
ـ
ښاپېرۍ مخ په خوب کې راښکاره کړ
لېونتوب مې ورسره موندهٔ سودا هم
ـ
که خوشال، د يار وصال په دنيا مومي
تمامي دنيا ترې ځار شه، ما فيها هم