غزل
[28.Dec.2016 - 00:59]لاړ که مې نظر شي زه به ستا لارې ته ګورمه
را دې شي اجل خو د وفا لارې ته ګورمه
څو به مې نظر کوي مزل په حجابونو کې
څو به دې د خلکو نه په غلا لارې ته ګورمه
ستړی یم د خپل فکر تر کوره رسیدای نه شم
وړی یم د چا ورکې سودا ، لارې ته ګورمه
پټ رانه منزل دی د رسمونو په ګردونو کې
ستا په لوري ځم خو د دنیا لارې ته ګورمه
نه پریږدي اعظمه د یادونو محفلونه مې
مخکې مخکې ځمه خو په شا لارې ته ګورمه
ارواښاد ډاکټر اعظم اعظم