10.02.2014 ساقي ته/د وفا سترګې
د وفا سترګې
شمع که سوزیږي رڼا هم لري
ګوره په خندا کې ژړا هم لري
رمز که د خوبانو تغافل کې دی
بیا هم کله ناز او ادا هم لري
څه که استغنا شته د دولت سره
دا د نازولو دنیا هم لري
خیر دی که بیلتون بلې لمبې لري
ښکلی چې د شونډو دوا هم لري
څه شو که هجران ذرې ذرې کړمه
سترګې د اشنا چې وفا هم لري
خدایږو په (سیلاب) که زر غمونه دي
ستا د تورو سترګو سودا هم لري
***
ساقي ته
راشه ساقي یو ځلې ډک د میو جام راکړه
خمار د عشق نیشه جذبه د انتقام راکړه
خدایږو دنیا نه یم مایوس سترګې مې تاته اړوي
نسیمه پریږده تغافل نوی پیغام راکړه
څو به خوږ من په زړه دردمند او لوغړن ګرځمه
مطربه راشه د خوښی نوی الهام راکړه
ناصحه ته افلاتوني درسونه ځانته وایه
ماته د خیال په نندارتون کې ګل اندام راکړه
چې حوصلی مې فیصلی د مشکلاتو وکړي
ما ته په دغه سلسه کې لوړ مقام راکړه
چې پړاوونه کړاوونه راته یو قدم شي
داسې نظر داسې وزر د عشق په نام راکړه
یا مې زر پورته کړه له خاورو د خودی معراج ته
یا مې کړه شمار په لیونو کې نوم د سرسام راکړه
په کار مې ندي سره او سپین ماڼې بنګلې نه غواړم
لیونی مینه د مجنون او د بهرام راکړه
یا مې په برخه کامیابي کړه چې ښادي وګورم
یا خودی ژوند د ناکامی لره انجام راکړه
چې د پتنګ غوندې لوګې شم په طواف د اشنا
خدایه (سیلاب) ته زر قدرت د دې احرام راکړه
شاعر : شهید امان الله سېلاب (ساپی)
ترتیب کوونکی : انجنیرعبدالقادرمسعود
10.02.2014