مینه
مینه سر کې څه اسانه غوندې ښکاري
رسول يې سر ته ګرانه غوندې ښکاري
نه هغه راځي نه زه ورځم تپوس له
دا خبره خو څه ورانه غوندې ښکاري
زړه کې وايي چې لا هغسې ژوندی دی
ما چې وویني حېرانه غوندې ښکاري
معلومېږي چې مې خېر د زړګی نه شته
نن په ما چې مهربانه غوندې ښکاري
دلته شته دی د مجنون د پښو خاپونه
دا صحرا راته ودانه غوندې ښکاري
مشغولا لره یې راشه د یار خیاله
زړه مې ستړی او ستومانه غوندې ښکاري
ستا دیدن ځکه د سر په قیمت اخلم
دا سودا راته ارزانه غوندې ښکاري
هغه روح چې د محفل دی څوک خبر کړئ
مجلسونه، څه بې جانه غوندې ښکاري
تصور دې د اسرار د لارې مل شو
لار د ژوند ځکه روښانه غوندې ښکاري
۲۸ می ۱۹۶۱ خیبر میډیکل کالج، پیښور
شعري ټولګه : د ژوند نغمه
د پاڼو شمېرنه : ۷۹ - ۸۰